Үндэсний цэцэрлэгт хүрээлэн дэх “Нөхөрлөл” талбайд “Шилдэг багууд” крикетийн спортын тэмцээн амжилттай болж шилдгээ шалгарууллаа. Тус тэмцээнийг Монголын Крикетийн холбоо, Кристина Нобелийн хүүхдийг ивээх сантай хамтран зохион байгуулсан юм.
Монгол улсад крикетийн спортыг хөгжүүлэх, олон улсын крикетын тэмцээнд оролцох шилдэг баг тамирчныг бэлтгэх, тамирчдын ур чадварыг сайжруулах зорилготой зохион байгуулсан тус тэмцээнд нийслэлийн дүүргүүд болон Дархан-Уул, Баянхонгор, Говьсүмбэр аймгийн баг тамирчид оролцлоо.
Жил бүр уламжлал болгон зохион байгуулагддаг тус тэмцээний хаалтын ажиллагаанд Их Британи, Умард Ирландын Нэгдсэн Вант Улс, АНУ, Австрали, БНЭУ-ын элчин сайдууд уригдан ирж, баг тамирчдад амжилт хүсэж, дэмжин ажиллахаа илэрхийлж байлаа.
Монголын крикетын холбооны “Нөхөрлөл” талбайг “Үндэсний цэцэрлэгт хүрээлэн”-гийн ерөнхий төлөвлөлтийн дагуу 2017 онд байгуулсан юм. Энэхүү талбай нь Төв азидаа томоохонд тооцогдох, олон улсын стандартад нийцсэн талбай болсон билээ. Иргэд олон нийт та бүхэн критетийн спортыг сонирхдог, энэ спортоор хичээллэдэг бол Үндэсний цэцэрлэгт хүрээлэн дэх крикетийн талбайд ирж чөлөөт цагаа спортоор хичээллэн өнгөрүүлээрэй.
